Nakaimbento og talagsaong paagi ang usa ka tech-savvy nga lalaki aron papahawaon ang mga salampati nga sige’g bilin og “regalo” sa iyang balkonahe.
Pinaagi sa Artificial Intelligence (AI), naghimo siya og awtomatikong water gun turret nga makaila sa salampati pinaagi sa camera ug dayon mopusil og tubig ngadto niini. Matud pa, gikapoy na siya sa pirming pagpanglimpyo sa hugaw sa mga langgam mao nga iyang gipahimuslan ang teknolohiya.
Kung makit-an sa camera ang kalapati, awtomatikong motuyok ang water gun ug “pishhht!” diretso kini og tubig sa wala damhang bisita. Tungod niini, dali nga manglupad ang salampati palayo.
Mikaylap sa social media ang video sa maong imbensyon ug daghan ang nalingaw. Adunay netizens nga nag-ingon nga andam silang mopalit dayon kung ibaligya kini sa merkado.
Samtang ang uban naggamit og panapton o plastik aron papahawaon ang mga langgam, kini nga lalaki mas advanced na—AI na mismo ang gi-hire isip guwardiya sa iyang balkonahe. Busa mga salampati, bantay-bantay kay basin naa nay “water cannon” nga naghulat ninyo!
Photo courtesy: Oddity Central
