Mikunhod sa 2.18 milyon metric tons ang kinatibuk-ang imbentaryo sa bugas sa nasud niadtong Agosto 2026, o 6.3 porsiyento nga pagkunhod kumpara sa 2.32 milyon metric tons nga natala sa samang bulan niadtong 2025.
Base sa pinakabag-ong datos sa Philippine Statistics Authority o PSA, ang pagkunhod kasagarang tungod sa pagnubo sa stocks sa National Food Authority o NFA ug sa mga panimalay.
Mikunhod og 32.2 porsiyento ang rice stocks sa mga bodega sa NFA, gikan sa 452.74 ka libo nga metric tons niadtong Agosto 2025 ngadto sa 306.82 ka libo nga metric tons niining Agosto.
Samang mikunhod usab og 0.3 porsiyento ang stocks sa mga panimalay, gikan sa 837.94 ka libo ngadto sa 835.84 ka libo nga metric tons. Sa matag bulan, mikunhod usab ang kinatibuk-ang rice inventory og 13.3 porsiyento, gikan sa 2.51 milyon metric tons niadtong Hulyo.
Sa kinatibuk-ang stocks niadtong Agosto, 47.5 porsiyento ang anaa sa commercial sector, 38.4 porsiyento sa mga panimalay, ug 14.1 porsiyento sa mga bodega sa NFA.
Bisan pa niini, gipasalig sa Department of Agriculture o DA nga igo ang suplay sa bugas sa nasud hangtod sa kataposan sa tuig, tungod sa padayon nga pag-abot sa imported rice ug pagsugod sa panahon sa ani.
Samtang, ang NFA nakapalit pa lamang og hapit katunga sa iyang 790,000 metric tons nga target sa palay procurement alang sa 2026 gikan sa mga mag-uuma. Apan gipasalig sa ahensya nga dili kini makaapekto sa buffer stocks sa nasud.
Photo Courtesy: Philippine News Agency
