Gipasabot sa Cagayan de Oro Water District (COWD) nga dako og panginahanglan ang pagpaayo ug rehabilitasyon sa ilang mga pasilidad aron mas mapalambo pa ang serbisyo sa tubig alang sa mga konsumidor.
Matod ni Engineer Edna Najeal, Assistant General Manager sa COWD, nanginahanglan kini og dakong pondo tungod kay daghan nang mga pasilidad ug imprastraktura nga kinahanglan ayuhon ug modernisahon.
Gipatin-aw usab ni Najeal nga walay subsidy nga madawat ang COWD gikan sa nasyonal nga gobyerno tungod kay usa kini ka Government-Owned and Controlled Corporation o GOCC. Busa, ang ilang operasyon ug mga proyekto nagasalig lamang sa kita nga gikan sa bayad sa serbisyo sa tubig.
Dugang pa niya, lisod nga mapatuman ang dagkong kalamboan ug pag-upgrade sa sistema kon magpabilin ang kasamtangang water rates nga wala pa mausab sukad pa sa tuig 2014.
Sumala sa opisyal, importante ang igo nga pondo aron masiguro ang padayon ug mas kasaligan nga suplay sa tubig alang sa nagkadaghang konsumidor sa syudad ug kasikbit nga mga lugar.
Photo courtesy: Cagayan de Oro Water District
