Kung nagtuo ka nga taas na ang linya sa cashier, mas taas diay ang zipline sa South Africa nga mokabat og 3.2 kilometro o kapin duha ka milya ang gitas-on.
Ang K3 Zipline sa Overberg Mountains karon maoy giila nga pinakataas nga zipline sa kalibutan. Human sa unom ka tuig nga pagplano, mahimo nang molupad ang mga turista sa hangin sa kusog nga mokabat og 150 kilometro matag oras.
Matod sa mga nakasulay, hinay pa sa sugod ang dagan sa zipline apan paglabay sa pipila ka metros, mura na kuno kag gisakyan og express nga uwak kay paspas na kaayo ang dagan ug nagkalubog na sa imong panan-aw ang mga kahoy.
Apan adunay kondisyon ang pagsakay. Kinahanglan nga dili ka hubog, walay sakit sa kasingkasing ug dili mosobra sa 120 kilos ang timbang. Kay kung sobra, basin dili na zipline ang tawag ana kundili “cargo shipment!”
Ug kay dili pa kontento ang mga naghimo niini, nagplano pa gyud sila og 5 kilometro nga zipline. Busa kung mahuman na kini, basin makadala na kag baon, makahuman og paniudto ug makatulog sa tunga-tunga sa biyahe sa zipline!
Photo courtesy: Oddity Central
