Moduyog ang City Government of Valencia, pinaagi sa City Health Office, sa pagsaulog sa Dengue Awareness Month 2026 ug ASEAN Dengue Day karong umaabot nga Hunyo 15.
Ubos sa temang “ASEAN UNITED: Zero Dengue Deaths – A Future We Build Together by 2030,” nanawagan ang kagamhanang lokal sa panaghiusa sa tibuok komunidad aron epektibong malikayan ug makontrolar ang pagkakatap sa maong sakit.
Sumala sa City Health Office, nagpabiling usa ka dakong hulga sa panglawas sa katawhan ang dengue, hinungdan nga mas gipalig-on pa karon ang kampanya nga “Alas-Kwatro Kontra Mosquito.” Ubos niini nga programa, hugot nga giawhag ang mga residente nga matag alas kuwatro sa hapon, mangita ug maglaglag sa mga dapit nga mahimong breeding site o mahanan sa mga lamok.
Lakip sa mga importanteng pamaagi nga angay buhaton sa matag panimalay mao ang “4T”—ang Taob o pagtabon sa mga sudlanan sa tubig, Taktak o pagtangtang sa natigom nga tubig, Tuyo o pagpabiling uga ug limpyo sa palibot, ug Takip o ang hustong pagtabon sa mga imbakan sa tubig aron hingpit nga malikayan ang pagpangitlog sa mga lamok nga nagdala sa dengue.
Gilauman sa mga otoridad nga pinaagi sa aktibong partisipasyon sa komunidad, makab-ot sa dakbayan ang dako nga tinguha nga Zero Dengue Deaths pag-abot sa tuig 2030.
Photo Courtesy: LGU – Valencia City
