Gilauman nga mag-abli na alang sa target nga operasyon karong umaabot nga Disyembre karong tuig 2026 ang Bukidnon Airport nga nahimutang sa lungsod Don Carlos
Kini human sa mahinungdanong Ocular Inspection ug Round Table Discussion niaging adlaw pinangulohan ni Governor Rogelio Neil “Oneil” Roque kauban ang Civil Aviation Authority of the Philippines (CAAP), LGU Don Carlos, ug mga partner agencies sama sa OTS, PNP-AVSEGROUP, Bureau of Quarantine, BFAR, BAI, ug Department of Trade and Industry (DTI).
Sumala sa gobernador, kini nga inisyatiba maoy usa ka dakong lakang isip pagpangandam sa umaabot nga opisyal nga operasyon sa maong tugpahanan, aron masiguro nga hapsay ug luwas ang tanang pasilidad sa dili pa kini hingpit nga buksan alang sa mga biyahero kansang mosulong sa mas lig-on nga ekonomiya ug mas kusog nga turismo ang probinsya
Sa maong higayon gipresentar ni Engr. Job De Jesus, Civil Aviation Authority of the Philippines (CAAP) Area Manager Region -10, ang datus sa maong proyekto kung asa nakompleto na ang Phase 1 ug Phase 2 sa runway ug embankment works niadtong 2022 ug 2023, samtang anaa na sa 95.22 porsyento ang pagtukod sa Passenger Terminal Building nga makasulod og 425 ka mga pasahero.
Gidesinyo ang airport nga adunay 2,100 ka metros nga runway alang sa mga jet aircraft, taxiway, ug apron nga maka-akomodar og unom ka ayroplano; samtang ang uban pang pasilidad sama sa tower ug cargo terminal nga anaa sa 33.8 porsyento ang gipaspasan aron mosuporta sa target nga pag-abli karong tuiga bisan pa man sa contract completion niini sa tuig 2027
Atol sa panagtigom, dako ang pasalamat ug pagdayeg sa mga partisipante ngadto kang Senator Juan Miguel “Migs” Zubiri, kinsa maoy nag-initiate ug nagduso niining giisip nga pinakadakong single infrastructure project sa kasaysayan sa Bukidnon.
Photo Courtesy: LGU – Bukidnon/Progress watch
