Nagpadayag sa iyang kabalaka si Konsehal Imee Rose P. Moreno niadtong Lunes kalabot sa gisugyot nga pagtukod sa usa ka fish landing facility sa Barangay Bonbon, tungod sa report gikan sa Department of Environment and Natural Resources kun DENR nga nag-ingon nga daling bahaon ang lugar.
Gipasabot ni Moreno ang posibleng mga peligro kung magtukod og imprastraktura sa mga lugar nga daling maigo sa kalamidad, ug iyang gihatagan og gibug-aton nga kinahanglang masuta kung angayan ba nga ipadayon ang proyekto.
Isip tubag, nanalipod si Majority Floor Leader Konsehal Edgar Cabanlas sa gisugyot nga pagtukod pinaagi sa pag-ingon nga ang husto nga pamaagi sa engineering dako og ikatabang aron maminusan ang risgo sa baha.
Gipasabot niya nga mamahimo kining makorihian pinaagi sa engineering work, depende sa pamaagi sa pagtukod, ug nagtoo siya nga aduna nay pagtulun-an o pagtuon nga gihimo bahin niini busa dili pasabot nga dili na magamit ang dapit. Naglatid usab si Cabanlas og pipila ka mga solusyon sa engineering nga pwedeng gamiton aron mapalig-on ang lugar batok sa baha.
Photo courtesy: Cagayan de Oro City Council
