Hingpit nang mitalikod sa armadong pakigbisog ug mibalik sa sabakan sa balaod ang usa ka babayeng miyembro sa CTG niadtong milabay’ng adlaw
Giila sa mga otoridad ang maong nagbalik-loob nga si alyas “Ana,” 33-anyos, minyo, ug residente sa lungsod sa Cabanglasan, Bukidnon.
Sumala sa taho, si alyas “Ana” nagsilbi kaniadto isip medic sa usa ka yunit sa CTG ilalom sa Sub-Regional Committee 2 sa North Central Mindanao Regional Committee.
Pormal kining misurender ngadto sa mga personahe sa 1003rd Maneuver Company Headquarters didto sa Sitio Colon, Barangay Halapitan, sa lungsod sa San Fernando.
Uban sa iyang pagsurender, gitunol usab ni alyas “Ana” ang usa ka improvised shotgun rifle nga walay markings, usa ka steel magazine, ug upat ka mga buhing bala sa 12-gauge shotgun. Ang maong kalampusan resulta sa hiniusang operasyon sa nagkadaiyang yunit sa kapulisan, militar, ug uban pang pwersa sa seguridad sa Bukidnon.
Tungod niini, gipadayag sa Bukidnon PNP nga padayon ug dili pabalibaran ang ilang mga operasyon batok sa insurhensya ug ilegal nga armas aron hingpit nga mapalig-on ang kahusay, kalinaw, ug kalamboan sa tibuok probinsya.
Photo Courtesy: PCADG Northern Mindanao
