Gipatuman sa Lokal nga Kagamhanan sa Valencia City ang Mandatory Drug Testing Program kagahapon Hunyo 2, 2026 isip kabahin sa kampanya alang sa usa ka limpyo ug drug-free nga workplace sa syudad.
Gatosan kapin ka mga regular ug casual nga empleyado gikan sa nagkalainlaing opisina ang miapil sa maong kalihokan.
Gipaluyohan ang programa sa administrasyon ni City Mayor Amie Galario uban sa suporta sa 10th Sangguniang Panlungsod kansang tumong sa pagsiguro nga ang mga empleyado sa gobyerno magpabiling luwas gikan sa impluwensiya sa ginadiling droga ug makahatag og matinud-anong serbisyo publiko.
Giklaro ni LGU Spokesperson Jun Galario nga adunay tukmang aksyon batok sa mga empleyadong mapamatud-ang positibo sa paggamit sa ginadiling droga human sa confirmatory test diin kadtong mga casual employees mahimong matangtang sa serbisyo, samtang ang mga regular employees moagi sa proseso sumala sa mga lagda sa Civil Service Commission
Gipahibalo usab sa LGU nga adunay random drug testing alang sa mga Job Order workers sa umaabot.
Sumala sa pamunuan, ang maong programa makatabang sa pagpalig-on sa disiplina, integridad, ug propesyonalismo sa mga empleyado samtang gipadayon ang taas nga kalidad sa serbisyo alang sa katawhan.
Photo Courtesy: LGU – Valencia City
