Nagpasidaan ang Department of Information and Communications Technology Region 10, sa publiko nga magmatngon sa paggamit sa libre ug public WiFi tungod sa risgo sa cybercrime ug pagpangawat sa personal nga impormasyon.
Matod pa ni Engr Michael Andrew Buot, OIC ARD sa DICT10 nga adunay security feature ang opisyal nga Free WiFi program sa DICT diin moagi una ang user sa opisyal nga DICT landing page sa dili pa maka-access sa internet.
Gipasabot niini nga kung diretsong maka-connect ang usa ka user sa giingong DICT Free WiFi nga walay mugawas nga DICT page, posible kining peke o gitamper na sa mga cybercriminal.
Dugang pa ni Buot, ang paggamit sa dili kasaligan nga public WiFi mahimong maghatag higayon sa mga hacker nga ma-access ang koneksyon sa usa ka user ug makuha ang sensitibong impormasyon sama sa passwords, social media accounts, ug online banking details.
Busa, giawhag sa DICT ang publiko nga likayan ang pag-login sa online banking ug ubang sensitibong accounts samtang naggamit og public WiFi ug siguruhong lehitimo ang network nga ilang konektahan aron malikayan ang posibleng pagpangawat sa datos ug pinansyal nga pagkawala.
Photo Courtesy: Philstar.com
