Gikumpirma ni National Bureau of Investigation (NBI) Director Melvin Matibag nga nagpagawas og subpoena ang ahensya batok sa pipila ka personalidad may kalabotan sa imbestigasyon sa nahitabong pagpamusil sa Senado ug sa pag-ikayas ni Sen. Ronald “Bato” dela Rosa.
Apil sa mga gipatawag sa NBI mao sila si:
- Mao Aplasca – Suspended Senate Sergeant-at-Arms
- Joselito De Sesto – Pasay City Chief of Police
- Jean Robles – Deputy Chief of Staff ni Sen. Robin Padilla
- Virgilio Carino – Ang uyoan sa senador
Sumala ni Matibag, mahinungdanon nga maimbestigahan ang papel sa mga indibidwal aron matino ang posibleng kakuwangon sa seguridad ug kung kinsa ang adunay tulubagon sa insidente.
Dugang pa sa NBI, tumong sa mga subpoena nga makakuha og tin-aw nga testimonya ug ebidensya nga makatabang sa paghimo og lawom nga report mahitungod sa nahitabong kasamok.
Ang pagpamusil sa Senado nagdala og grabeng kahadlok sa publiko ug nag-abli og mga pangutana kalabot sa kaandam sa mga security forces sulod sa nasudnong lehislatura.
Sa pagkakaron, nagpadayon ang imbestigasyon sa NBI ug gipasalig ni Matibag nga walay bisan kinsa ang gawasnon sa tulubagon kung mapamatud-an nga adunay kakuwangon o kalambigitan sa insidente.
Gihisgutan usab sa ahensya nga ang resulta sa imbestigasyon isumite ngadto sa Department of Justice (DOJ) alang sa tukmang legal nga aksyon batok sa mga mapamatud-ang nakasala.
Photo courtesy: National Bureau of Investigation/ Facebook
