Andam nga modawat sa hagit ang Quezon City sa pag-host sa Palarong Pambansa 2027 human opisyal nga itugyan kanila sa Department of Education ang sunod nga edisyon sa nasudnong sporting event.
Gibutyag ni Mayor Joy Belmonte nga dako ang responsibilidad nga ilang atubangon ilabina kay taas ang sumbanan nga nahimo sa Agusan del Sur sa pag-host sa Palarong Pambansa 2026. Bisan pa niini, nagpabilin siyang masaligon nga makahimo ang siyudad og malampusong palaro pinaagi sa suporta sa gobyerno ug pribadong sektor.
Gilauman nga gamiton sa Quezon City ang nagkalain-laing world-class nga pasilidad alang sa mga kompetisyon ug kalihokan sa Palaro. Apan giila usab sa lokal nga kagamhanan ang mga hagit sama sa trapiko ug pag-atiman sa libu-libong mga atleta ug delegado.
Bisan sa maong mga hagit, tumong sa QC nga mahatagan og hapsay ug talagsaong kasinatian ang mga partisipante sa pagbalik sa Palarong Pambansa sa National Capital Region sa 2027.
Photo courtesy: Quezon City Government/ Facebook
