Nasikop pag-usab sa kapulisan ang usa ka lalaki nga giila nga drug surrenderer human kini madakpan sa usa ka buy-bust operation sa Barangay Aras-asan, Cagwait, Surigao del Sur niadtong gabii sa Mayo 30, 2026.
Ang operasyon gihimo alas 7:35 sa gabii sa Purok Golden Shower, nga gipangunahan sa Cagwait Municipal Police Station (MPS) kauban ang Philippine Drug Enforcement Agency (PDEA) Surigao del Sur.
Ang nadakpan naila sa alyas nga “Tagalog,” 41-anyos, usa ka trabahante ug residente sa maong barangay. Matod sa kapulisan, ang suspek usa na ka drug surrenderer ug naapil sa Provincial-Level PDEA Watchlist, apan nadakpan gihapon kini sa gipahigayon nga anti-illegal drug operation.
Nasakmit gikan kaniya ang pipila ka sachet nga gituohang shabu, buy-bust money, ug uban pang drug paraphernalia. Ang gidaghanon sa nakumpiskang gidudahang shabu mokabat sa 2.0 gramos, nga adunay kantidad nga ₱13,600 base sa Dangerous Drugs Board (DDB).
Ang pagmarka ug imbentaryo sa mga ebidensya gihimo sa mismong lugar sa operasyon, ubos sa presensya sa mga saksi aron maseguro ang husto ug legal nga proseso sa paghawid sa ebidensya.
Gidala dayon ang suspek sa Cagwait MPS alang sa tukmang dokumentasyon ug pag-andam sa kaso ilawom sa Republic Act No. 9165 o Comprehensive Dangerous Drugs Act of 2002.
Photo courtesy: Cagwait MPS
