Gi-isyu sa City Government of Tandag ang usa ka Executive Order nga nagatugot sa pagpadayon sa Charter Day 2026 ug Sangkaan Festival 2026, human kini kaniadto gi-kansela tungod sa krisis sa suplay sa kuryente.
Pinaagi sa Executive Order No. 19-1, Series of 2026, gi partially revoke o gibawi sa lokal nga panggamhanan ang una nilang Executive Order No. 19 nga nagkansela sa maong mga kalihokan. Ang bag-ong mando gipirmahan ni Tandag City Mayor Roxanne C. Pimentel.
Sa pinaka una nga EO No. 19, gi-kansela ang Charter Day ug Sangkaan Festival isip tubag sa nagpadayon nga energy supply constraints ug National Energy Emergency, ug aron mabutang ang pondo ngadto sa mas importante nga serbisyo sa gobyerno.
Apan sumala sa bag-ong pagtuon ug konsultasyon sa nagkalain-laing buhatan ug stakeholders, nakit-an nga posible na nga ipadayun ang mga selebrasyon sa organisado, responsable, ug kontroladong paagi nga dili makadaot sa interes sa publiko.
Tungod niini, gitugotan na ang pagpadayon sa official activities, cultural events, civic programs, ug uban pang kalihokan nga konektado sa Charter Day 2026 ug Sangkaan Festival 2026.
Photo courtesy: Provincial Tourism Sursur
