Natapos sa ika-6 nga puwesto ang Caraga Region sa Palarong Pambansa 2026 nga gipahigayon sa Probinsiya sa Ilocos Norte, usa ka mahinungdanong kalampusan kumpara sa ilang nahimutangan sa miaging tuig.
Sumala sa opisyal nga talaan sa medalya, nakatigom ang Caraga og kinatibuk-ang 97 ka medalya nga naglangkob sa 30 ka gold, 19 ka silver, ug 48 ka bronze.
Dako ang natampo sa mga atleta sa elementarya ug sekondarya sa maong kalampusan pinaagi sa ilang maayong pasundayag sa nagkadaiyang sporting events. Sa Elementary category, nakasakmit og mga bulawang medalya ang Arnis, Athletics, Chess, Taekwondo, ug Tennis.
Samtang sa Secondary category, nakadugang usab og mga bulawang medalya ang Caraga pinaagi sa Arnis, Boxing, Football, Gymnastics, Pencak Silat, Swimming, Tennis, Wrestling, ug Wushu.
Kahinumduman nga sa Palarong Pambansa 2025, anaa lamang sa ika-8 nga puwesto ang Caraga Region nga adunay 21 ka gold, 20 ka silver, ug 43 ka bronze nga medalya. Ang pagsaka niini ngadto sa ika-6 nga puwesto karong tuiga nagpakita sa padayon nga paglig-on sa programa sa sports development ug sa dedikasyon sa mga atleta, coaches, ug sports officials sa rehiyon.
