Nagpadayon ang Central Visayas sa pagkupot sa ika-upat nga pwesto sa kinatibuk-ang medal tally sa Palarong Pambansa 2026 bisan pa sa mahait nga hagit gikan sa host region nga Caraga.
Base sa partial ug dili pa opisyal nga tally sa Department of Education nakabaton ang rehioyon og 29 ka bulawanong medalya, 28 ka plata ug 40 ka tumbaga, samtang nagsunod ang Caraga nga adunay 28 ka bulawan.
Dako’g natampo sa kalampusan sa rehiyon ang pito ka bulawang medalya nga nakuha sa katapusang adlaw sa kompetisyon. Lakip niini ang mga kadaugan sa dancesport, boxing, weightlifting, lawn tennis ug futsal.
Kon mapadayon sa Central Visayas ang iyang pwesto hangtod sa pinal nga ihap sa medalya, kini mahimong labing taas nga nahumanan sa rehiyon sukad sa 2018 ug mas maayong resulta kaysa ikapitong puwesto niini sa miaging tuig.
Samtang nagpabiling lider sa kinatibuk-ang medal tally ang National Capital Region (NCR) nga adunay 85 ka bulawan, 68 ka plata ug 69 ka tumbaga, gisundan sa Calabarzon (54-47-56), Davao Region (31-29-32), ug Western Visayas (30-33-42).
Photo courtesy: Palarongpambansa2026.com
