Hingpit nang gidisposar sa lokal nga pangagamhanan sa Kalilangan ang mga nakumpiskar nga undocumented o smuggled nga mga sigarilyo didto sa Municipal Landfill kagahapong adlawa.
Gipangulohan ang maong kalihokan ni Mayor Atty. Raymon Charl O. Gamboa, kauban ang Municipal Health Office (MHO) Dr. Ray Ralf T. Feril, MLGOO Jeffrey Romeo Q. Caangay, mga personahe sa Kalilangan Municipal Police Station (MPS), ug Bureau of Fire Protection (BFP) Kalilangan aron masiguro ang hapsay, transparent, ug legal nga proseso.
Ang mga giguba nga sigarilyo gilangkoban sa mga nakumpiskar niadtong mosunod nga mga petsa, Abril 15, 2026: 14 ka reams sa Modern Cigarettes (Red), 5 ka reams sa Cannon White, 5 ka reams sa San Marino White, 3 ka reams sa San Marino Red, 7 ka cases sa Greenhills Cigarette White, ug 1 ka case sa Commando White. Marso 12, 2026: 6 ka cases sa Modern Cigarettes (Red). Marso 9, 2026: 3 ka cases (150 ka reams) sa Commando Red.
Kining mga ilegal nga sigarilyo nakumpiskar atol sa mas gihugtan nga checkpoint operations nga gipahigayon didto sa Sitio Ticub, Pamotolon, Kalilangan, Bukidnon. Ang operasyon gilusad sa Philippine National Police – Regional Mobile Force Battalion (RMFB) 10, 1004th Maneuver Company sa panguna ni PMAJ Yasser A. Macalimbon, Company Commander, ug ubos sa superbisyon ni PLTCOL Bernard E. Pagaduan, OIC sa RMFB 10 (Lead Unit).
Human sa maong mga operasyon, ang mga nakumpiskar nga produkto giturn over ngadto sa Municipal Health Office (MHO) sa Kalilangan alang sa saktong dokumentasyon, inventory, ug mga custodial procedures hangtod sa adlaw sa opisyal nga pagguba niini.
Nagpadayon karon ang LGU Kalilangan pagpalig-on sa ilang suporta sa kampanya batok sa mga ilegal nga kalihokan isip kabahin sa ilang tinguha nga mamintinar ang kalinaw, kahapsay, ug kaayohan sa tibuok lungsuranon.
Photo Courtesy: LGU Kalilangan
