Nakapasar sa ikaduhang pagbasa ang gisugyot nga Tourism Code sa Dakbayan sa Malaybalay atol sa Sangguniang Panlungsod (SP) Session niadtong nakalabay nga adlaw.
Gipresentar ang maong ordinansa ug giduso pinaagi ni City Councilor Hon. Brian Nelson T. Flores, Chairperson sa Committee on Tourism kinsa gihatagan og gibug-aton ang tinguha sa kagamhanang lokal nga palig-onon ang pagdumala sa turismo, pagpreserba sa kultura, malungtarong kalamboan (sustainable development), ug ang paghatag ug suporta sa lokal nga industriya sa turismo.
Hisayrang ang Tourism Code usa ka hiniusang tinguha ug kolaborasyon tali sa Gobyerno sa Dakbayan sa Malaybalay ug sa Bukidnon State University (BukSU), partikular na ang Faculty sa Hospitality Management. Giagi kini sa sunod-sunod nga konsultasyon, panukiduki, teknikal nga panon-aw, ug pagpalambo sa polisiya aron makamugna og usa ka komprehensibong giya alang sa turismo sa siyudad.
Kung hingpit na kining mapatuman isip balaod, gilauman nga maghatag kini og tin-aw nga mga sumbanan ug mekanismo alang sa pagplano sa turismo, pagdumala sa mga destinasyon, pagpanalipod sa kultura, mga pamuhunan sa turismo (investments), akreditasyon, ug ang partisipasyon sa mga stakeholder.
Sa pagkakaron, ang maong ordinansa gipaubos pa sa dugang nga pagtuon ug pagplastar sa mga detalye sa dili pa isalang sa ikatulong pagbasa sa mga umaabot nga sesyon sa Sangguniang Panlungsod.
Photo Courtesy: SP Malaybalay City/Tourism Office
