Nanawagan ang World Health Organization (WHO) sa dinaliang tigil-putukan sa Democratic Republic of the Congo (DRC) aron mapugngan ang pagkatap sa Ebola samtang padayon ang panagbangi sa rehiyon.
Matud sa WHO nga nigrabe ang outbreak sa Ebola sa taliwa sa nagpadayon nga tensiyon hinungdan nga naghuot ang mga nibakwit ngadto sa mga displacement camps diin mas paspas nga mokatap ang sakit.
Sumala ni WHO Director-General Tedros Adhanom Ghebreyesus, grabeng naapektuhan sa gubat ug sakit ang sitwasyon sa eastern DRC, diin naglisod ang mga health worker sa paghatag og tabang tungod sa kagubot.
Sumala kaniya, dili mahimong epektibo ang pagtubag sa outbreak kon magpadayon ang pagpamomba ug panag-away, busa nanawagan siya sa tanang habig nga magpatuman dayon og ceasefire.
Ang kasamtangang Ebola outbreak gikan sa Bundibugyo strain, nga wala pay aprubadong bakuna o tambal, ug gideklarar sa WHO isip international health emergency tungod sa paspas nga pagsaka sa kaso.
Kapin 900 na ang gidudahang kaso ug sobra 200 ang gidudahang namatay sa tulo ka probinsya sa eastern Congo, lakip ang mga lugar nga kontrolado sa mga rebeldeng grupo.
Matod sa mga humanitarian organization, daghan sa mga namatay mga bata, samtang ang mga refugee sites sa silingang nasod nga Uganda sobra na sa kapasidad tungod sa pagdagsa sa mga namalhin.
Photo courtesy: msn
