Nagplano ang Disposal Committee sa mga dili na magamit nga sakyanan sa kagamhanan sa Dakbayan sa Mandaue nga paspasan ang pag-dispose sa kapin 2,000 ka mga nasakmit nga sakyanan ug motorsiklo aron mamenosan ang kahuot sa city impounding area.
Ang komite gilangkuban sa Traffic Enforcement Agency of Mandaue (TEAM), Department of General Services, ug City Legal Office.
Sa usa ka interbyu, si TEAM Head Hyll Retuya miingon nga grabeng kahuot na ang impounding area sa kasamtangan.
Matod ni Retuya, ang maong lakang gilauman nga makatabang sa pagpagaan sa kahuot sa impounding facility.
Miingon siya nga magtigom ang komite uban sa Traffic Board aron pormal nga ideklarar nga abandoned ang mga sakyanan, subay sa city ordinance nga nag-ingon nga ang mga sakyanan nga magpabiling na-impound sulod sa sobra unom ka bulan ikonsiderar nga abandoned.
Dugang pa niya, ang mga sakyanan mahimong iapil sa public auction kung opisyal na kining ideklarar nga abandoned.
Sumala ni Retuya, daghan sa mga na-impound nga sakyanan anaa na sa dili maayong kondisyon, ug adunay uban nga sukad pa niadtong 2015 nga na-impound, nga sa teknikal nga paagi gikonsiderar nang abandoned.
Photo courtesy: The Freeman
