Nakakuha si Presidente Ferdinand R. Marcos Jr. og gibana-bana nga $3.4 bilyon (o hapit P210 bilyon) nga investment commitments gikan sa mga kumpanya sa Japan atol sa usa ka business roundtable didto sa Tokyo. Kini nga mga giplanuhang pamuhunan gilauman nga mosuporta sa sektor sa manufacturing, tourism infrastructure, renewable energy, ug supply-chain development sa nasod. Tuyo sa lakang nga madani ang mga kumpanya nga ibalhin ang ilang supply-chain dinhi sa Pilipinas aron mapanalipdan ang lokal nga ekonomiya batok sa mga risgo sa gubat ug nagasakang presyo sa enerhiya sa kalibutan.
Gipahayag ni Presidente Marcos ngadto sa mga ehekutibo sa mga iladong conglomerates ug institusyong pinansyal sa Japan nga tin-aw ang direksyon sa Pilipinas ngadto sa pagtukod og ekonomiya diin ang imprastraktura, industriya, pinansya, ug human capital nagkahiusa isip usa ka sistema sa pag-uswag.
Gipasabot sa administrasyon nga dako ang papel sa pamatigayon ug turismo isip nag-unang makina sa kalamboan, ilabi na taliwala sa kalibutanong krisis, taas nga presyo sa lana, ug mga kakulian sa trade tungod sa gubat sa Middle East. Giyagyag ni Marcos ang nasod isip usa ka strategic ug long-term nga destinasyon alang sa mga kumpanyang Hapon nga nagtinguha nga mapalapdan ang ilang operasyon sa Southeast Asia.
Sumala usab ni Trade Secretary Maria Cristina A. Roque, agresibo nilang giposisyon ang Pilipinas isip strategic hub sa ASEAN alang sa smart manufacturing, green metals, ug renewable energy. Gidugang sa palasyo nga kini nga mga pamuhunan gilauman nga makamugna og liboan ka mga trabaho alang sa mga Pilipino, samtang nagpasiugda sa technology transfer ug industrial expansion sa nasod. Gawas sa tradisyonal nga imprastraktura, gi-promote sab sa gobyerno ang sektor sa turismo, logistics, ug aviation aron makadani og mas taas ug malungtarong kapital gikan sa mga langyaw nga magpapatigayon.
Photo courtesy: CEOWORLD magazine
