Gibalita sa state television sa Iran nga nakakuha matod pa ang Tehran og draft sa usa ka pasiunang memorandum of understanding (MOU) uban sa Estados Unidos kalabot sa posibleng pagtapos sa panagbangi sa duha ka nasod.
Subay sa report, napatik sa draft framework nga ibalik sa Iran sa normal o pre-war levels ang commercial shipping kun pagbiyahe sa mga barkong pangnegosyo sa Strait of Hormuz sulod sa usa ka bulan. Isip baylo, kuhaon usab sa Estados Unidos ang mga puwersa militar niini nga duol sa Iran ug hunongon ang naval blockade o pagbabag sa kadagatan.
Matod pa sa state TV sa Iran, dili pa pinal ang framework ug dili una molihok ang Tehran hangtod wala pa’y “tangible verification” o konkretong kasigurohan sa mga kasabutan.
Nasulat usab sa draft nga dili lakip ang mga military vessel o barkong panggubat sa kasabutan, ug ang Iran gihapon ang modumala sa pag-agi sa mga barko sa Strait of Hormuz kaabag ang nasod sa Oman.
Dugang pa niini, kung magkaangayan ug adunay pinal nga kasabutan sulod sa 60 ka adlaw, mamahimo kining aprubahan isip usa ka binding resolution sa United Nations Security Council.
Nasayran nga kining kasunduan tali sa U.S. ug Iran naggikan sa mga indirect talks kun dili direktang panag-istorya nga gisugdan human mibutho ang gubat niadtong Pebrero, diin ang nasod sa Pakistan ang nahimong nag-unang tigpataliwala alang sa usa ka hunong-buto.
Photo courtesy: Getty Image
