Gimando sa International Criminal Court (ICC) ang usa ka bag-ong pagsusi sa kahimtang sa panglawas ni kanhi presidente Rodrigo Duterte aron masuta kung makahimo pa ba kini sa pag-atubang sa hearing may kalabotan sa iyang giatubang nga kasong crimes against humanity.
Sa gipahigayon nga unang status conference niadtong Miyerkules, gipahayag ni ICC Trial Chamber III Judge Joanna Korner nga usbon sa mga eksperto ang pag-assess sa kahimtang ni Duterte human nagsumite og mosyon ang iyang kampo.
Sumala sa depensa, ang unang medical assessment gihimo lamang alang sa confirmation of charges proceedings ug dili alang sa mismong actual trial.
Gibutyag ni Korner nga posibleng i-mando dayon sa korte ang bag-ong pagsusi aron makakuha og updated nga report mahitungod sa panglawas sa kanhi presidente.
Tungod niini, gilugwayan una sa ICC ang pagtakda sa eksaktong petsa kung kanus-a magsugod ang hearing.
Matod pa ni Korner, mahinungdanon nga masayran una ang tinuod nga kondisyon ni Duterte ilabi na nga duna kini kalabotan sa iyang pangedaron ug sa posibleng mga medikal nga problema.
Gihisgutan usab sa status conference ang nagkadaiyang isyu sa kaso sama sa pretrial deadlines, pagsumite sa mga ebidensya, mga lengguwahe nga gamiton sa husay, ug ang disclosure obligations sa matag panig.
Sumala sa korte, buot sa ICC Prosecution nga magsugod ang trial karong Nobyembre 30, samtang ang legal representative usab sa mga biktima nagtinguha nga sugdan kini sa umaabot nga Setyembre.
Sa laing bahin, gisugyot sa ICC Registry nga sa Enero 2027 na lang sugdan ang trial tungod sa mga isyu nga may kalabotan sa interpretation o paghubad sa pinulongan.
Photo courtesy: International Crminal Court
