Padayon ang ratsada sa Philippine Aquatics, Inc. (PAI) sa pagpalapad sa ilang grassroots ug elite development program sa tibuok nasod aron makahimo og mga world-class nga talamre ug atleta sa nagkadaiyang disiplina sa aquatics.
Gikumpirma ni PAI Secretary General Eric Buhain sa gipahigayon nga “Usapang Sports” forum, Huwebes, Mayo 28, nga nagbunga na ang ilang holistic development program pinaagi sa agresibong mga regional coaching, learn-to-swim programs, ug serye sa mga kompetisyon. Gidugang pa ni Buhain nga ang grabeng gidaghanon sa misalmot sa miaging National Tryouts—diin kapin sa usa ka libo (1,000) ka mga medalista gikan sa nagkalain-laing rehiyon ang nagtigi—usa ka tinong kamatuoran nga misaka na ang kalidad sa swimming sa nasod.
Tungod sa tryouts, nakapili ang PAI og 24 ka mga magdudula alang sa 40th Southeast Asian Age Group Championships sa Malaysia, ug 20 ka batan-ong swimmers alang sa 20th Asian Age Group Championships sa Bangkok, Thailand. Gawas sa naandan nga swimming, gipahayag ni Buhain nga seryoso sab ang ilang pag-andam sa upat pa ka disiplina sa aquatics sama sa water polo, diving, artistic swimming, ug open water swimming aron mamahimong competitive ang Pilipinas sa tanang aspeto. Gani, ang nasod ang mo-host sa 4th Southeast Asian Open Water Swimming Championships karong Agosto 21 hangtod 23 didto sa Boracay New Coast sa Aklan, ug ipahigayon ang tryouts niini karong Hunyo 5 hangtod 7.
Dugang pa niini, dako usab ang pagpangandam sa PAI alang sa umaabot nga Asian Games sa Nagoya, Japan karong Setyembre 19 hangtod Oktubre 4. Una nang sigurado ang pwesto sa unom ka gold medalists sa miaging SEA Games sa pangunguna ni Olympian Kayla Sanchez, apan gipahinumdoman gihapon sila ni Buhain nga mas maayong mosalmot sa umaabot nga national tryouts karong Hunyo 19 hangtod 21 sa Teofilo Yldefonso Swimming Center aron masukod og maayo ang ilang abilidad. Ang tryouts bukas usab alang sa mga Pinoy nga swimmers nga kasamtangang nagpuyo ug nag-training sa gawas sa nasod.
Photo coutesy: Philippine Aquatics, Inc./ Facebook
