Gipaniguro sa Philippine National Police (PNP) nga dili nila hatagan og special treatment si Senador Ronald “Bato” dela Rosa taliwala sa kabalaka nga dunay pipila ka mga polis nga mamahimong luag ang ilang pagtratar sa kanhi hepe sa kapulisan.
Matod ni PNP Chief Gen. Jose Melencio Nartatez Jr., nga hugot nga naglihok ang PNP sulod sa legal nga pamaagi ug subay sa gipanumpaang katungdanan sa pag-alagad ug pagpanalipod sa katawhan.
Buot ipasabot niini, nga walay bisan kinsa nga labaw sa balaod unsa pa ang ilang ranggo.
Gihatagan usab niya og gibug-aton nga dili makaapekto sa pagpahigayon sa mga operasyon sa kapulisan ang pagtahod kang Senador Dela Rosa isip kanhi labing taas nga opisyal sa PNP.
Dugang pa niya nga gilauman nga mosunod ang tanang pulis sa standard operating procedures nga walay kahadlok o pabor-pabor.
Nanawagan usab siya kang Sen. Dela Rosa nga hingpit nga mokooperar sa legal nga proseso.
Photo courtesy: inquirer
