Nagpasiugda ang Department of Migrant Workers (DMW) og usa ka “Regional Caravan on Anti-Illegal Recruitment and Trafficking in Persons” alang sa mga Barangay Local Government Units sa siyudad sa Valencia. kagahapon Mayo 26, 2026
Tumong sa maong caravan nga mapalig-on ug mapalawom pa ang kahibalo sa mga opisyal sa barangay ug sa tibuok komunidad batok sa illegal recruitment ug human trafficking. Gihimo kini sa DMW tungod kay nagpabilin gihapong taas ang ihap sa mga nabiktima sa mga illegal recruitment alang niadtong gusto makatrabaho sa gawas sa nasud.
Nag-unang namulong sa kalihokan si Atty. Francis Andrew O. Paduganan gikan sa DMW diin iyang giabi-abi ang mga partisipante. Samtang mipadayag sab sa iyang hugot nga suporta si Mayor Amie Galario ngadto sa mga programa nga naghatag proteksyon ug hustong impormasyon sa mga nangetag trabaho, ug gipasiugda ang importansya sa pagpanalipod sa katawhan batok sa mga illegal recruiters ug mga sindikato.
Atol sa caravan, gihisgutan sa mga resource speakers ang DMW mandate, MWPD programs, ug ang mga lecture kalabot sa Anti-Illegal Recruitment and Trafficking in Persons (AIRTIP), lakip na ang probisyon sa R.A. 9208 (Anti-Trafficking in Persons Act) nga gi-amendar sa R.A. 10364. Nagpahigayon usab og open forum ug simulation activity aron mas masabtan ang legal nga proseso, diin nahimong malampuson ang kalihokan pinaagi sa koordinasyon sa Public Employment Service Office o PESO-Valencia
Photo Courtesy: LGU-Valencia City/Seeburger blog
