Gikumpirma ni Department of Justice (DOJ) Secretary Fredderick Vida nga dili maggahin og kwarta ang kagamhanan isip patong sa ulo o bounty alang niadtong makatudlo sa nahimutangan ni Senador Ronald “Bato” de la Rosa.
Matod sa kalihim, sa pagkakaron duna na sila’y gikuptang mga impormasyon nga makatabang sa mga ahensya sa balaod aron matultolan ang lokasyon sa magbabalaod ug masiguro nga makit-an kini sa mga hingtungdang awtoridad.
Nanawagan usab si Sec. Vida ngadto sa senador nga isip kanhi hepe sa Philippine National Police (PNP) ug isip usa ka magbabalaod, mas maayong makigtinabangay kini ug mosunod sa proseso sa balaod. Gipasabot sa opisyal nga ang dili pag-atubang sa senador sa iyang warrant naghatag og dili maayong panglantaw ug nagpahimutang og kalibog sa publiko, hinungdan nga mas maayong atubangon na lamang niini ang naghulat kaniya nga arrest warrant gikan sa International Criminal Court (ICC).
Tungod niini, plano sa kalihim nga padalahan sa sulat ang usa sa mga abogado sa senador nga si Atty. Jimmy Bondoc, human kini nipadayag nga duna siya’y kasayuran kung asa ang nahimutangan sa magbabalaod. Ang maong sulat nagtumong sa paghangyo sa maong abogado nga makig-alayon sa husto ug legal nga proseso aron hapsay nga mapatuman ang maong warrant sa labing daling panahon.
Photo Courtesy: Department of Justice
