Mipadayag sa kabalaka ang lokal nga kagamhanan kabahin sa nahitabong siltation ug environmental disturbance sa Malinao Falls didto sa barangay Kalasungay Malaybalay City.
Gibutyag ni City Mayor Jay Warren Pabillaran nga usa ang maong busay sa mga nag-unang natural nga atraksyon sa Malaybalay nga kanunay’ng giapil sa tourism promotions sa syudad, apan nausab ang kahimtang niini human sa natatala nga soil movement nga gituohang adunay kalabutan sa bag-ong gi-construct ug giablihan nga dalan sa maong dapit.
Dugang pa ni Pabillaran nga heavily silted na ang Malinao Falls diin naapektuhan na ang natural nga agos sa tubig tungod sa kadaghan sa mga bato ug sediment nga natapok sa creek. Gipasabot sa opisyal nga duna na’y gihimo nga validation ang usa ka monitoring team diin nakit-an ug nadokumentohan pinaagi sa mga video, litrato, ug drone footage ang grabeng kadaot sa vegetation, natural nga dagan sa slope, ug sa tibuok kahimtang sa maong dapit.
Tungod sa seryosong kahimtang sa atraksyon, giawhag sa Mayor ang City Environment and Natural Resources Office o CENRO nga palawman ang gihimong imbestigasyon aron matino sa hingpit ang tinuod nga hinungdan ug kinatibuk-ang epekto sa nahitabong pagkaguba sa kinaiyahan sa lugar.
Lakip sa mga dinalian nga rekomendasyon nga gihisgutan mao ang pagpatuman sa slope stabilization, erosion control measures, ug revegetation kun pagpananom pag-usab sa maong dapit. Gawas niini, gilauman usab ang pagpahigayon og usa ka environmental damage assessment aron saktong matino ang tinuod nga epekto niini ngadto sa Malinao Creek
Photo Courtesy: LGU – Malaybalay City
