STAKEHOLDERS FORUM GILUNSAD BATOK ILLEGAL DRUGS ADVOCACY PARA SA KABATAN -ONAN

Nagkatigom ang mga lider sa kabatan-onan, mga tigpatuman sa gobyerno, mga miyembro sa akademya, ug usa ka Civil Society Organization (CSO) atol sa Stakeholders’ Forum for Strategic and Sustainable Anti-Illegal Drugs Advocacy nga gipangunahan sa Department of the Interior and Local Government (DILG) Bukidnon.

Ang Stakeholders Forum, nagpakita sa importansya sa panaghiusa sa komunidad aron mapanalipdan ang kabatan-onan gikan sa peligro sa droga. Pinaagi sa pagtinabangay sa mga lider, ginikanan, eskwelahan, ug uban pang sektor, mas mapalig-on ang kampanya batok sa illegal nga droga ug mas mapadayon ang paggiya sa mga batan-on ngadto sa maayong kaugmaon.

Lakip sa mga partisipante ang mga Local Youth Development Officers (LYDOs), mga Anti-Drug Abuse Council (ADAC) Focal Persons, mga kaubang ahensya, mga organisasyon sa sibil nga katilingban, ug mga representante gikan sa College of Public Administration and Governance (CPAG) sa Bukidnon State University (BukSU).

Sa iyang mensahe, isip representante ni DILG Bukidnon Provincial Director Rhona Pedraza-Abadilla, gipasiugdahan ni Program Manager Frances Clare L. Alamban ang kamahinungdanon sa hiniusang responsibilidad sa pagsumpo sa ilegal nga droga ug pagpanalipod sa mga komunidad, ilabina sa sektor sa kabatan-onan, gikan sa makadaot nga epekto niini.

Gidugang niya nga ang malungtarong adbokasiya batok sa droga makab-ot lamang pinaagi sa lig-on nga panagtambayayong tali sa gobyerno, mga lider sa kabatan-onan, mga institusyon sa edukasyon, ug mga tigpatuman sa komunidad. Usa sa mga nag-unang highlight sa kalihokan mao ang diskusyon bahin sa mga adbokasiya batok sa ilegal nga droga nga gipresentar usab ni PM Alamban.

Naghatag ang maong presentasyon og mga bag-ong kalamboan (updates) sa pagpatuman sa BIDA Program ug naghatag og gibug-aton sa kamahinungdanon sa mga interbensyon nga nakatutok sa pagpugong (prevention) ug nakasentro sa komunidad sa pagtubag sa mga isyu batok sa ilegal nga droga sa kabatan-onan.
 
Photo Courtesy: DILG Bukidnon