Gipagula sa Philippines Statistics Authority Northern Mindanao ang resulta sa 2025 National Demographic and Health Survey (NDHS) kagahapong adlawa.
Sa report ni PSA Chief Statistical Specialist, Sarah Balagbis, nakita nga padayon nga mius-os ang Total Fertility Rate (TFR) sa Northern Mindanao ngadto sa 1.9 ka bata matag babaye nga nag-edad 15 hangtod 49 anyos, mas labing ubos kung itandi sa tuig 2003 nga anaa sa 3.8 ka bata.
Kini tungod, subay sab sa survey, 53.3% sa mga minyo nga babaye sa rehiyon ang nagkanayon nga dili na sila gusto magka-anak pa.
Gawas niini, mius-os usab ang kaso sa teenage pregnancy sa rehiyon ngadto sa 6.4% sa mga batan-ong babaye nga nag-edad 15 hangtod 19-anyos, nga mas ubos kung itandi sa natala kaniadto nga 10.9 porsyento.
Anaa na ang Northern Mindanao sa ika-pito nga pwesto sa tibuok nasud sa adunay pinakataas nga ihap sa teenage pregnancy. Ang Zamboanga Peninsula ang nag-una sa listahan nga adunay 9.3 %, samtang ang National Capital Region (NCR) gihapon ang pinakaubos nga anaa sa 1.8 %.
Sa hisgutanang family planning, natala nga 34.3 % sa kinatibuk-ang kababayen-an sa rehiyon ang naggamit og bisan unsang pamaagi sa contraception. Apan mas taas ang 58.3% nga sexually active apan dili minyo nga nagagamit og contraceptives aron nga dili mabuntis.
Photo courtesy: PSA Northern Mindanao
