Gibutyag ni Barangay Captain Philip Poras nga nakadawat siya og death threat kabahin sa kontrobersyal nga demolition sa mga panimalay sa Lot 1 ug Lot 2 sa Barangay Mambuaya, Cagayan de Oro City.
Matod ni Kapitan Poras, dili na niya tugotan ang mga manulod ug mamuyo sa mga pribadong luna nga walay legal nga dokumento o permit. Gipasabot usab niya nga adunay basihanan ang iyang pagpatuman sa city ordinance nga nagmando sa pagpabakante sa mga panimalay nga ilegal nga natukod.
Bisan pa niini, nagpadayon ang tensyon tali sa barangay, claimant ug mga residente nga naapektuhan sa planong demolition.
Samtang, nakanselar usab kagahapon ang gitakdang dayalogo tali sa mga residente, barangay officials ug claimant human giaprobahan sa lokal nga panggamhanan ang hangyo sa mga residente nga isibog una ang panagpulong.
Padayon karon ang paghulat sa bag-ong iskedyul sa dayalogo aron masulbad sa malinawon nga paagi ang isyu.
Photo courtesy: Mambuaya Barangay Council/ Facebook
