Naka dawat og bag-ong paglaom ang mga ube farmers sa Pilipinas tungod sa nagkadako nga global purple craze nga nagpasabot og kusog nga panginahanglan sa ube sa international market. Sumala sa report, daghang Pinoy entrepreneurs ug exporters ang nakakita og oportunidad sa pagpalapad sa ube industry, nga nagkonektar direkta sa mga mag-uuma aron matubag ang kalibog ug kakulang sa supply chain sa produkto.
Apan giatubang gihapon sa industriya ang mga problema sama sa kakulang sa standardization, lisod nga sistema sa pag-supply, ug dili klaro nga branding sa ube. Adunay kabalaka usab ang ubang nasod sama sa China ug Vietnam nag-produce og parehas nga produkto ug ginabaligya isip “Filipino ube,” nga nakaapekto sa tinuod nga identidad ug market value sa lokal nga produkto.
Gipasiugda usab ang panginahanglan sa proteksyon pinaagi sa Geographical Indication aron mapanalipdan ang kinampay ug uban pang klase sa ube.
Gipadayag usab sa Department of Agriculture nga nagplano sila og dugang pondo nga mokabat og P100 milyon aron mapalambo ang produksyon, research, ug suporta sa mga mag-uuma.
Samtang nagtinabangay ang gobyerno ug pribadong sektor, nagpadayon ang pagtaas sa global demand sa ube nga makita na sa mga bakery sa ubang nasod sama sa South Korea, Europe, ug Middle East, nga naghatag og dako nga tsansa sa pag-uswag sa panginabuhi-an sa mga Pilipinong mag-uuma.
Photo Courtesy:lifestyle Asia
