Patay ang duha ka indibidwal, samtang isa pa ang padayon nga gitambalan human sa usa ka pagpamusil nga nahitabo alas 4:45 sa hapon sa Acaso Street, Purok 1B, Barangay Apokon, Tagum City niadtong Mayo 20, 2026.
Base sa report sa Tagum City Police Station, gilayon nga miresponde ang Mobile Patrol-7 aron seguruhon ang crime scene ug sugdan ang hot pursuit operation batok sa mga suspek. Gipangulohan ang imbestigasyon ni PCPT Willy Cubero ubos sa supervisyon ni PLTCOL Edgardo G. Bahan, ang Officer-in-Charge sa Tagum PNP.
Pag-abot sa mga otoridad, ilang nakita ang duha ka samaran nga lalaki ug usa ka samaran nga babaye nga naghigda tapad sa usa ka traysikol. Gidala gilayon sa rescue team sa CDRRMO ang mga biktima ngadto sa Davao Regional Medical Center alang sa medikal nga atensyon.
Giila ang mga biktima si alyas “Ron,” 33-anyos; alyas “Ana,” 33-anyos sab pangidaron; ug alyas “Ron2x,” 27-anyos, nga pulos residente sa Doña Trinidad, Barangay Communal, Davao City. Sa inisyal nga imbestigasyon, nasayran nga nagsakay ang mga biktima sa usa ka traysikol uban ang drayber, ug tulo pa ka kauban gikan sa Tipaz Street, Barangay Magugpo East sa dakbayan. Apan pag-abot nila sa lugar sa insidente, gisundan sila sa duha ka motorsiklo nga gisakyan sa mga wala mailhing armadong lalaki.
Kalit lang nga gipusil sa mga suspek ang mga biktima sa makadaghang higayon, hinungdan nga nangatumba sila sa dalan ug naka-angkon ug samad sa nagkadaiyang parte sa kalawasan. Nakalingkawas usab ang drayber sa traysikol ug uban pang pasahero pinaagi sa pagtago. Human sa pagpamusil, midiretso og sibat ang mga suspek padulong sa wala pa matinong direksyon.
Narekober sa mga imbestigador gikan sa crime scene ang 16 ka basiyo sa bala ug usa ka live ammunition sa .45 kalibre nga pistola nga isumite alang sa ballistic examination ug firearm profiling. Sa follow-up investigation sa ospital, gideklarar nga dead on arrival sila “Ana” ug “Ron2x,” samtang si “Ron” padayon nga giatiman sa ospital tungod sa grabeng samad sa lainlaing bahin sa iyang lawas ug ulo.
Padayon pa karon ang imbestigasyon sa kapolisan aron mailhan ug madakpan ang mga responsable sa krimen. Usa matod pa sa gitan-aw nga motibo mao ang personal nga panagbangi, apan giimbestigahan usab ang ubang posibleng anggulo sa maong pagpamusil.
