Nagtala og 11 porsyento nga pagsaka sa ilang net income ang Pag-IBIG Fund sa unang quarter sa tuig, diin niabot kini sa P16.77 bilyon gikan sa P15.01 bilyon sa parehong panahon sa miaging tuig.
Sumala sa ahensya, ang maong double-digit nga pagsaka naggikan sa maayong pagkolekta ug makanunayong kita sa housing ug short-term loans, ingon man sa 51 porsyento nga pag-uswag sa ilang investment income nga nitala og P3.03 bilyon.
Tungod niining lig-on nga panalapi, gipahayag ni Pag-IBIG Fund CEO Marilene Acosta nga mapadayon sa ahensya ang mubu nga 3 porsyento nga interes sa pautang sa balay para sa mga kwalipikadong socialized housing borrowers ubos sa 4PH Program, taliwala sa krisis sa Middle East.
Sa pikas bahin, gipahayag ni DHSUD Secretary ug Pag-IBIG Board chair Jose Ramon Aliling nga ang maayong performance nagpakita nga ang ahensya nagpabiling lig-on ug andam mosuporta sa kamandoan ni Presidente Marcos nga himuong barato ug sayon kab-oton ang pabalay.
Misaka usab og 3 porsyento ang kinatibuk-ang kabtangan (total assets) sa ahensya ngadto sa P1.28 trilyon sa katapusan sa Marso, gikan sa P1.23 trilyon sa katapusan sa tuig 2025. Matod ni Acosta, kini nga kalig-on nagtugot kanila sa pagpadayon sa paghatag og taas nga balik-buhis sa tigum sa mga miyembro ug barato nga pundo para sa balay.
