Death penalty ang gipahamtang sa usa ka korte sa Islamabad, Pakistan, batok sa usa ka 23-anyos nga suspek diin miangkon sa pagpatay sa 17-anyos nga TikTok influencer nga si Sana Yousaf.
Sumala sa mga report, nahitabo ang krimen niadtong Hunyo sa miaging tuig human gibalibaran sa biktima ang balik-balik nga pagpanguyab sa suspek. Giingon nga si Hayat na-obsess sa biktima human sila adunay online interactions.
Sa imbestigasyon, giingon nga niadto pa sa Islamabad ang suspek pila ka adlaw sa wala pa ang krimen aron matod pa mo-congratulate sa birthday sa biktima. Apan bisan pa sa pagdumili ni Sana Yousaf nga makigkita kaniya, nakasulod gihapon siya sa ilang balay ug didto miresulta ang panaglalis nga misangpot sa pagpamusil ug miresulta sa kamatayon sa biktima.
Human sa desisyon sa korte, giingon sa amahan sa biktima nga usa ka “leksyon” alang sa mga kriminal ang silot niini. Ang korte usab nagmando nga ang suspek mobayad og 2.5 million rupees o mga $9,000 isip danyos sa pamilya sa biktima.
Si Sana Yousaf usa ka sikat nga content creator nga adunay kapin usa ka milyon nga followers sa TikTok ug halos 500,000 sa Instagram. Nailhan siya sa iyang mga light content sama sa fashion trends, lip-sync videos, ug mga daily life posts.
Photo Courtesy: ProPakistani
