Nagpasidaan si Cuban President Miguel Díaz-Canel nga mahimong mosangpot sa “bloodbath” og dakong epekto sa kalinaw ug kalig-on sa rehiyon kung adunay military action ang Estados Unidos batok sa Cuba.
Sa iyang post sa X, gipasiugda niya nga dili hulga ang Cuba ngadto sa U.S. Misunod kini sa report sa Axios nga nag-ingon nga nakakuha ang Cuba og kapin 300 military drones ug nakighisgot sa posibleng paggamit niini batok sa U.S. naval base sa Guantanamo Bay Naval Base, mga barko militar sa Amerika, ug Key West sa Florida.
Apan gipanghimakak kini sa Cuba ug giingong gihimo lamang aron adunay rason ang U.S. alang sa posibleng military intervention.
Samtang, pipila ka residente sa Havana ang mipadayag nga andam silang mosukol kung adunay pag-atake bisan pa sa giatubang nga kalisod sa ekonomiya sa nasud. Miingon si Sandra Roseaux, 57-anyos, nga dili sila magpasakop ug andam motubag ang Cuba bisan unsa pa ang kahimtang niini.
Padayon nga nagtaas ang tensyon tali sa U.S. ug Cuba human sa maong report ug mga pahayag sa duha ka kampo.
Photo Courtesy : NBC news
