Pormal na nga nadawat sa Senado kagabii, Mayo 13, 2026 ang Articles of Impeachment batok kang Vice President Sara Duterte, nga maoy nagtimaan sa pagsugod sa sunod nga yugto sa impeachment proceedings.
Alas 7:22 sa gabii sa dihang personal nga gitunol ni House Secretary General Atty. Cheloy Velicaria-Garafil ngadto kang Senate Secretary Mark Llandro “Dong” Mendoza ang maong mga dokumento.
Sumala kang Garafil, gisumite sa House of Representatives ang Articles of Impeachment human makompleto ang reproduction, collation, ug verification sa tanang impeachment records ug supporting attachments nga nalambigit sa kaso.
Mibutyag usab siya nga miabot sa liboan ka pages ang mga dokumento nga gipasa ngadto sa Senado tungod kay naglangkob kini sa nagkadaiyang documentary evidence, transcripts, certifications, findings gikan sa Commission on Audit (COA), financial records, affidavits, ug committee proceedings nga natigom atol sa imbestigasyon nga gipangulohan sa House Committee on Justice.
Apil usab sa gipasa sa Kamara ang usa ka selyadong kahon gikan sa Bureau of Internal Revenue (BIR) nga adunay sulod nga income tax returns ni VP Sara Duterte ug sa iyang bana nga si Atty. Manases Carpio.
Tungod niini, gilauman nga sa mosunod nga mga adlaw mag-convene ang Senado isip impeachment court aron pormal nga sugdan ang hearing ug paghusay sa impeachment trial batok kang VP Duterte.
Photo courtesy: House of Representatives
