Mipasar og resolusyon ang 10th Sangguniang Panlungsod sa Valencia City, Bukidnon nga nagpakita sa ilang pagsupak sa bisan unsang impeachment proceedings batok ni Vice President Sara Duterte-Carpio.
Kini pinaagi sa Proposed Resolution No. 1147-2026 nga gisagop niadtong Mayo 11, 2026. Ang maong resolusyon naglatid sa baruganan sa konseho nga dili mosuporta sa mga kalihokan nga makapahuyang sa liderato sa nasud.
Giduso ni Councilor Mauricio S. Sistoso Jr. ang resolusyon ug gisagop kini sa tibuok konseho. Gipasiugda niini ang kamahinungdanon sa political stability alang sa epektibong pagserbisyo sa katawhan.
Ang konseho nagtan-aw nga ang malinawon nga proseso ug panaghiusa sa mga lider mao’y pundasyon sa maayong pagdumala sa lokal ug nasyonal nga gobyerno.
Nagpakita ang maong aksyon sa determinasyon sa Valencia City Council sa pagpalig-on sa panaghiusa ang responsableng pamalaod.
Ilang giingon nga ang pagsuporta sa kalig-on sa sistema politikal makatabang sa paghatag og mas episyente nga serbisyo ug kalamboan sa katawhan sa Bukidnon ug sa tibuok nasud.
Photo Courtesy:SP Valencia City
