Misamot ang kasuko sa pipila ka residente sa syudad sa malaybalay human mibuto ang diskusyon sa social media kalabot sa giingong dili konsistent nga suplay sa tubig gikan sa PrimeWater.
Nagsugod ang kontrobersiya human gipaambit ni konsehal Jason Chad Ayala ang usa ka presentasyon nga nagpakita sa “number of hours” o iskedyul sa agas sa tubig sa nagkalain-laing barangay. Sumala sa maong datos, adunay gitakdang oras kung kanus-a adunay tubig ang matag lugar, apan giingon sa daghang residente nga dili kini motakdo sa ilang aktwal nga kasinatian.
Sa mga komento sa social media, mipadayag og reklamo ang mga molupyo gikan sa lain-laing barangay. Sa Barangay 2 o Kalasungay, giingon sa usa ka netizen nga usahay buntag lamang moagas ang tubig ug dili pa moabot og usa ka oras.
Aduna sab reklamo gikan sa Barangay 10 (Zone 6B) nga bisan walay klarong agas sa tubig, padayon gihapon ang pag-abot sa billing nga mokabat og kapin ₱400 hangtod ₱500. Sa Casisang, partikular sa Purok 6 sa Greenfield Subdivision, giingong mokabat lamang og 30 minutos ang agas sa tubig sulod sa usa ka adlaw, samtang sa Sumpong, namatikdan sa mga residente nga mas sayo na karon maputol ang suplay kumpara sa miaging mga bulan.
Padayon pang nagpaabot ang mga residente og klarong tubag gikan sa PrimeWater kalabot sa maong mga alegasyon
Photo Courtesy: Rappler
