Mokabat sa 130 ka estudyante sa Central Mindanao University ang miapil sa duha ka adlaw nga field exposure sa Barangay Magkalungay sa Mount Malimumu isip kabahin sa ilang pagtuon sa evolutionary biology.
Sumala sa report, giubanan ang mga estudyante sa mga personahe sa 89th Infantry Battalion ug mga magtutudlo gikan sa CMU atol sa pagtuon sa highland area nga nahimutang sa lungsod sa San Fernando.
Ang Barangay Magkalungay, nga ancestral domain sa Tigwahanon-Manobo tribe, kaniadto giila nga balwarte sa New People’s Army apan karon usa na ka peace zone pinaagi sa mga peacebuilding ug security programs nga gipadayon sa lokal nga panggamhanan ug mga lider sa komunidad.
Mitabang usab sa pag-facilitate sa field study sila tribal leaders Tagyaman Sinangkap ug Layden Esteban kauban ang mga personnel sa militar ug lokal nga opisyal.
Sumala kang Lt. Col. Antonio Bulao, malipayon ang 89th IB nga nakasuporta sa educational activity sa mga estudyante sa lugar nga kaniadto delikado tungod sa presensya sa mga rebelde.
Ang 89th Infantry Battalion sakop sa 1003rd Infantry Brigade nga ubos sa 10th Infantry Division.
Gilauman usab nga adunay dugang pang study tours nga pagahimoon ang CMU sa maong lugar isip kabahin sa ilang educational activities ug experiential learning programs.
via II 89th Infantry Battalion PA
