Nakaplagan nga wala nay kinabuhi ang lawas sa usa ka 41-anyos nga lalaki sulod sa iyang apartment sa Panadtalan, Maramag alas 1:20 sa hapon Mayo 10, 2026.
Nailhan ang biktima, usa ka residente sa maong lugar, nakit-an nga hubo ug naghigda sa higdaanan samtang nagsugod na ang pagkadugta sa lawas niini.
Sumala sa imbestigasyon sa Maramag Municipal Police Station, usa ka lalaki nga adunay legal nga pangidaron ang miadto sa apartment alas 12:30 sa hapon aron kuhaon ang ilang service vehicle. Apan pag-abli niya sa pultahan, iyang nadiskobrehan ang wala nay kinabuhi nga lawas sa biktima.
Gibutyag pa sa nakadiskobre nga katapusan niyang nakita ang biktima niadtong Mayo 6, 2026, alas 5:00 sa hapon atol sa selebrasyon sa adlaw nga natawhan niini uban sa mga kauban sa trabaho.
Sa inisyal nga pagsusi, walay namatikdan nga timailhan sa foul play. Dugang pa, gidala ang patayng lawas sa pinakaduol nga ospital alang sa post-mortem examination aron matino ang hinungdan sa kamatayon.
Photo Courtesy: Maramag PNP
