Nalakip sa listahan sa World University Rankings for Innovation o WURI 2026 ang Bukidnon State University ug Central Mindanao University isip kabahin sa Global Top 500 Innovative Universities.
Base sa gipagawas nga ranking, nakab-ot sa BukSU ang ika-100 nga puwesto samtang naa sa ika-135 nga puwesto ang CMU.
Ang duha ka unibersidad gikan sa Bukidnon lakip sa lima ka higher education institutions sa Northern Mindanao nga naapil sa maong internasyonal nga ranking nga nagtan-aw sa innovation ug epekto sa mga programa sa eskwelahan.
Gawas sa overall ranking, nasulod usab ang BukSU sa 17 ka kategoriya sa World University Rankings for Innovation Top 100 institutions, samtang naapil ang CMU sa 11 ka kategoriya.
Lakip usab sa mga unibersidad sa Region 10 nga naapil sa Global Top 500 mao ang Mindanao State University at Naawan sa rank 209, University of Science and Technology of Southern Philippines sa rank 236, ug Misamis University sa rank 337.
Sumala sa World University Rankings for Innovation 2026, miuswag usab ang ranking sa upat ka state universities ug colleges sa rehiyon kumpara sa miaging tuig, samtang bag-ong naapil sa ranking ang Misamis University isip pribadong unibersidad.
Hisayrang ang World University Rankings for Innovation usa ka internasyonal nga university ranking system nga naghatag og gibug-aton sa innovation, research, ug kontribusyon sa mga eskwelahan ngadto sa komunidad ug industriya
Photo Courtesy: CHED -10
