Gisugyot karon sa Department of Health (DOH) ang total ban sa paggamit sa vape o e-cigarettes tungod sa hulga niini sa panglawas sa publiko.
Sumala kang Dominic Maddumba, OIC-Director III sa DOH Health Promotion Bureau, tumong sa maong sugyot ang hingpit nga pagdili sa paggamit sa vape aron malikayan ang negatibong epekto niini sa lawas sa tawo.
Apan kung dili matuman ang total ban, gisugyot sa DOH ang pagpahugot sa regulasyon, lakip na ang pagtangtang sa nagkalain-laing flavors sa vape products nga giila nga makadani ilabina sa kabatan-onan.
Gipasabot ni Maddumba nga ang flavored vape products usa sa mga hinungdan nganong daghang batan-on ang mosulay ug magpadayon sa paggamit niini, maong gitinguha nga iparehas na lamang kini sa regulasyon sa tradisyonal nga tobacco products.
Una nang nagpasidaan sa DOH nga ang paggamit sa vape ug uban pang produktong tabako mahimong hinungdan sa seryosong mga sakit sama sa cardiovascular disease, kanser, ug mga problema sa baga.
Padayon karon nga gitun-an sa DOH ang dugang mga lakang aron mapanalipdan ang panglawas sa publiko, ilabina sa mga kabatan-onan, batok sa peligro sa panigarilyo ug vaping.
Photo courtesy: ScitechDaily
