Nanguna ang lungsod sa Santa Cruz isip pinaka-adunahang munisipyo sa Davao Region, base sa 2024 Annual Financial Report sa Commission on Audit (COA).
Sumala sa report, miabot sa ₱1.980 bilyon ang total assets sa Santa Cruz, nga naglangkob sa cash ug cash equivalents, dalan, yuta, mga building ug imprastraktura, merkado, sakyanan, kagamitan, ug uban pang kabtangan sa lokal nga gobyerno.
Gipahayag ni Municipal Accountant Roanne Macrohon nga base gyud sa audited financial report ang maong datos ug mao kini ang opisyal nga basehan sa ranking.
Matod pa niya, adunay uban pang proyekto sama sa municipal government center nga wala pa naapil sa accounting records tungod kay gi-implementar kini sa Department of Public Works and Highways (DPWH) ug anaa pa sa proseso sa pag-turnover.
Nagpasabot kini nga posible pa nga mosaka ang total assets sa lungsod kung maapil na ang maong mga proyekto sa opisyal nga talaan.
Gituohan usab sa municipal accountant nga dako ang papel sa liderato ni Mayor Nelson “Tata” Sala Sr. sa pagkab-ot sa maong kalampusan.
Dili lamang gikan sa pondo sa munisipyo ang pagpatuman sa mga proyekto, kondili pinaagi usab sa suporta gikan sa nasyonal nga gobyerno ug ubang ahensya.
Dugang pa niya, halos 80 hangtod 90 porsyento sa mga proyekto ilalom sa 20% development fund ang nahuman na, nga nakatampo sa pagpalig-on sa imprastraktura ug ekonomiya sa lungsod.
Ang maong ranking nagpakita sa kahimtang sa pinansyal ug kapasidad sa mga lokal nga gobyerno sa Davao Region, ug nagsilbing sukdanan sa ilang performance sa pagdumala sa pondo ug pagpalambo sa ilang lugar.
