Gipahibalo sa World Health Organization (WHO) nga mokabat na sa pito ka mga kaso sa hantavirus ang ilang natala gikan Abril 1 hangtod Mayo 4, 2026.
Kahinumdoman nga usa ka cruise ship nga MV Hondius ang namatikdan nga adunay outbreak kabahin sa mga tawo nga adunay sintomas sa hantavirus samtang nagbiyahe sa kadagatan. Gani, gipahibalo sa mga otoridad nga duha ang kumpirmado nga natakdan ug lima ang gisuspetsahan, lakip na niini ang tulo ka tawo nga namatay.
Kahibaloan nga ang Hantavirus usa ka virus nga gikan sa mga ilaga ug mahimong mapasa sa tawo pinaagi sa ilang ihi, hugaw, o laway nga magresulta sa grabe nga mga sakit sama sa hantavirus pulmonary syndrome o hemorrhagic fever.
Subay niini, gibutyag ni Director-General Tedros Adhanom Ghebreyesus nga gikonsiderar sa WHO nga ubos ang peligro sa virus sa populasyon sa kalibutan, apan wala usab sila nagkumpyansa ug nagpadayon ang ilang pagmonitor sa sitwasyon ug gipasalig nga mag-isyu sila ug mga update kabahin niini.
Sumala sa WHO nga nagpadayon ang ilang hingpit nga imbestigasyon aron masuta ang hinungdan ug pagkaylap sa maong sakit.
Photo Courtesy: WHO
