Gikumpirma ni Atty. Edre Olalia, nga mo atubang sa korte si Mary Jane Veloso, sa unang higayon sukad sa iyang pagbalik sa Pilipinas niadtong tuig 2024.
Matod ni Olalia, mo testigo si Veloso, sa kaso nga iyang gisang-at batok sa iyang mga recruiter nga gipasanginlang nalambigit sa human trafficking, illegal recruitment ug estafa.
Gipasabot usab ni Olalia nga gimando na sa Korte Suprema nga ibalhin ang kaso gikan sa Nueva Ecija ngadto sa Regional Trial Court sa Mandaluyong City aron didto padayon nga madungog ang kaso.
Bisan pa niini, wala pa gihapon matakda ang eksaktong petsa sa pagsugod sa pagdungog sa kaso, batok sa mga akusado nga recruiters ni Veloso. Niadtong Miyerkules, miadto usab sa Department of Justice ang ginikanan ni Veloso uban sa iyang abogado alang sa usa ka “case conference” kalabot sa nagpadayon nga mga kaso.
Kahinumdoman nga si Veloso nadakpan sa Indonesia niadtong 2010 tungod sa kasong drug trafficking ug nakalikay sa silot nga kamatayon niadtong 2015 human mitahan ang iyang recruiter.
Pagkahuman sa 14 ka tuig nga pagkabilanggo sa Indonesia, mibalik siya sa Pilipinas niadtong Disyembre 18, 2024 ug karon gipabilin sa Correctional Institution for Women sa Mandaluyong City samtang naghulat sa proseso sa iyang clemency.
Photo Courtesy:Getty Image
