Nakumpiska sa kapulisan sa Kapalong, Davao del Norte ang napulo ka abandoned flitches o mga tabla sa kahoy nga falcata atol sa operasyon sa Purok 5, Barangay Florida, sa giingong lungsod ug probinsya, niadtong Mayo 5, 2026.
Base sa report, nakadawat og tawag gikan sa usa ka concerned citizen ang Kapalong PNP alas 10:50 sa buntag kalabot sa giingong gibiyaan nga mga troso daplin sa kalsada sa maong lugar. Dayon mitugpa ang mga pulis aron susihon ang impormasyon.
Pag-abot sa lugar, ilang nakompiska ang 10 ka tabla o tipak sa falcata nga adunay nagkadaiyang gidak-on. Ang mga nakuhang kahoy adunay kinatibuk-ang 430 board feet ug gibana-bana nga mokantidad sa P9,200.
Gihimo usab sa mga otoridad ang beripikasyon aron mahibal-an ang tag-iya sa mga kahoy apan wala kini molampos. Sumala sa mga residente sa lugar, gidala ang mga tabla tulo ka adlaw sa wala pa kini nakita ug gituohang gikan sa kabukiran nga bahin sa giingong lugar. Sumala pa nga gibiyaan kini sa wala mailhing grupo human makamatikod sa presensya sa mga awtoridad.
Sa pagkakaron, anaa na sa kustodiya sa Kapalong Municipal Police Station ang mga nakompiskang kahoy alang sa hustong disposisyon. Nakig-koordinar na usab ang kapulisan sa CENRO-Davao del Norte alang sa angay nga pagdumala sa nakuhang forest products.
Photo Courtesy : Lesprom
