Naigo sa trahedya ang usa ka fireworks factory sa Liuyang, Hunan province sa China human kini mibusikad og kusog niadtong Lunes sa hapon, nga mikalas sa kinabuhi sa dili muubos sa 21 ka tawo ug nakapasamad sa 61 pa, sumala sa state media.
Nahitabo ang pagsabog mga alas 4:43 sa hapon sa Liuyang Huasheng Fireworks Manufacturing and Display Company, usa sa mga lugar nga naila sa produksyon sa pabuto sa China.
Mga video sa social media nagpakita sa sunod-sunod nga pagbuto nga misaka ang dakong aso sa kawanangan samtang sa drone footage makita ang nagkalat nga mga debris ug mga guba nga estruktura.
Kapin 480 ka rescuers ang gipadala sa lugar, ug gihimo ang 3-kilometer control zone aron masiguro ang kaluwasan sa mga residente nga gipalayo gikan sa peligro. Nagpadayon usab ang search and rescue operations.
Gidakop ang management sa kompanya samtang giimbestigahan pa ang hinungdan sa insidente. Mi-awhag si Chinese President Xi Jinping sa “all-out efforts” sa pagluwas sa mga biktima ug pagpangita sa mga posibleng missing, ug pagpanubag sa mga responsable.
Photo Courtesy: The Report
