Nigamay ang gidaghanon sa basura nga ginaproduce sa kada panimalay sa syudad base sa pinakahuling waste analysis, apan misaka gihapon ang kinatibuk-ang basura tungod sa padayon nga pagdaghan sa populasyon, sumala sa City Environment and Natural Resources Office (CENRO).
Sa eksklusibong interbyu sa Juander Radyo Malaybalay, gipahayag ni CENRO Officer Mrs. Jessie G. Suson nga gikan sa 0.5 ka kilo nga basura kada panimalay matag adlaw sa miaging 10 ka tuig, mikunhod kini sa 0.25 ka kilo base sa resulta sa Waste Analysis and Characterization Study nga gihimo niadtong Disyembre.
Matod niya, nagpasabot kini nga mas nahimong conscious ang mga residente sa pagminus sa ilang basura. Bisan pa niini, mitaas gihapon ang total nga basura sa syudad tungod sa pagdaghan sa mga nagpuyo ug sa kadaghan sa mga panimalay sa Malaybalay.
Dugang pa ni Suson nga dili malikayan ang pagtaas sa waste generation samtang nagpadayon ang kalamboan sa syudad. Tungod niini, padayon ang paningkamot sa lokal nga gobyerno nga mapalambo ang waste management system, ilabina sa landfill.
Sumala sa CENRO, hapit na mapuno ang kasamtangang landfill base sa ilang miaging report. Busa, gisugdan na ang preparasyon alang sa pag-abli sa “Cell 2” isip kabahin sa expansion sa landfill aron matubag ang padayon nga pagdaghan sa basura sa siyudad.
Nagpadayon karon ang mga lakang sa siyudad aron masiguro nga matagad ang waste disposal samtang ginaduso usab ang kahibalo sa publiko sa pagkunhod sa basura
Photo Courtesy: City ENRO – Malaybalay
