Nakurat ug wala makatuo ang mga residente sa Sagar, India human mibutyag ang usa ka talagsaong kaso sa medikal nga nakaagaw sa atensyon sa publiko. Usa ka lalaki nga giilang si Shyam ang gituboan og sama sa “sungay” sa iyang ulo sulod sa lima ka tuig.
Base sa report, nagsugod ang maong pagtubo isip gamay nga bukol o gitawag og cutaneous horn. Wala kini dayon tagda ni Shyam ug usahay gipaputol lamang sa iyang barbero. Apan sa paglabay sa panahon, padayon kining nidako ug nitubo hangtod nahimong halos 4 pulgada ang gitas-on nga klarong makita sa ibabaw sa iyang ulo.
Niadtong 2019, napugos si Shyam nga mangayo og medikal nga tabang sa Bhagyoday Tirth Hospital. Natingala ang mga doktor sa kahimtang ug kadako sa maong pagtubo.
Gipasabot sa mga eksperto nga bisan og gitawag kini sa uban nga “Devil’s Horn,” kini sa tinuod usa ka sebaceous horn—usa ka talagsaong klase sa tumor nga gihimo gikan sa keratin, ang protina nga makita usab sa buhok ug kuko sa tawo. Kasagaran kini motubo sa mga parte sa lawas nga pirming ma-expose sa adlaw ug mahimong magsugod gikan sa gamay nga samad o kadaot sa panit.
Matod pa sa mga doktor, kadaghanan sa ingon nga pagtubo dili man delikado, apan adunay posibilidad nga mahimong precancerous kung dili matagad. Sa kaso ni Shyam, nakaapekto na kini sa iyang panglawas ug sosyal nga kinabuhi.
Malampuson nga natangtang sa mga neurosurgeon ang “sungay” pinaagi sa operasyon gamit ang sterile nga instrumento. Giayo usab ang base niini aron malikayan ang pagtubo pag-usab, ug gihimo ang skin graft aron matabonan ang samad sa iyang anit.
Photo Courtesy: 7NEWS
